Lokaverkefni Úlfhildar Ólafsdóttur til BA–gráðu í Mannfræði við Félagsvísindasvið Háskóla Íslands.
Útdráttur
Í þessari ritgerð mun ég fjalla um hvernig pólitísk, efnahagsleg og félagsleg einangrun birtist í samfélagi palestínskra flóttamanna í Líbanon og hvernig þessi einangrun hefur haft áhrif á og skapað sjálfsmynd flóttamannanna. Fjórar kynslóðir Palestínumanna hafa búið í landinu en afkomendur flóttamanna sem komu til Líbanon árið 1948 fæddust í flóttamannabúðunum í Líbanon og hafa aldrei stigið fæti inn í Palestínu. Þrátt fyrir það virðist Palestína vera eina heimalandið sem þessir afkomendur samsama sig við. Til þess að öðlast heildarsýn á stöðu Palestínumanna í Líbanon skoðaði ég hvernig pólitísk framganga í landinu hefur haft áhrif á flóttamennina, hvaða borgararéttinda þeir njóta og hvar sé skortur á þeim og hver sé félagsleg staða Palestínumanna innan almenns samfélags í Líbanon.
Birtist á Skemmunni.