Því miður kemur grátlegt skeytingarleysi íslenskra þingmanna gagnvart ástandinu á Gasa engum á óvart. Þó ætti þetta bréf Hjálmtýs Heiðdals og grein Eyal Weiszman sem við það er hengd að hreyfa við hverri heilvita manneskju. En því miður er það svo að þegar fólk kemst á þing og í áhrifastöður virðist það afsala sér drjúgum hluta af skynsemi sinni og um leið glata lestrarkunnáttunni líka. Ég efast um að fleiri en 1-3 þingmenn hafi lesið grein Weizmans sem skýrir óhugnanlega vandlega og í víðu samhengi fyrirætlanir þessa fasistaríkis sem á sér enga réttlætingu lengur.
Þær fyrirætlanir eru þó rökrétt framhald þróunar sem hófst þegar á 19. öld með hugmyndum um flutninga gyðinga til „Landsins helga“, var framhaldið með yfirráðum Breta yfir Palestínu og eindregnum stuðningi þeirra við landnám síonista og síðan stuðningi Vesturlanda og þegar á leið fyrst og fremst Bandaríkjanna við vafasama stofnun Ísraelsríkis.
Hugarfar í Ísrael er orðið helsjúkt, þorri fólks þar horfir með velþóknun á barnamorð, limlestingar, kynferðislegar pyndingar og geðþóttadauðarefsingar
Við lifum á ögurstund
Þessi síversnandi kúgunarsaga er yfirgengileg og allar götur síðan hafa Vesturlönd dyggilega stutt við þjóðernishreinsun og þjóðarmorð á svæðinu. Þau gera það enn, og þá kemur að kjarnanum í bréfi Hjálmtýs: Meðfram þessu hafa þær alþjóðastofnanir sem halda eiga uppi lögum og einhverju réttlæti meðal þjóða heimsins (með mjög misjöfnum árangri) markvisst verið eyðilagðar, gerðar marklausar. Þegjandi eða mjálmandi samþykki Vesturlanda í orði, og dyggur stuðningur í verki gerir það að verkum að markviss eyðilegging á Gasa og nú í Líbanon er orðin að fordæmi sem ómögulegt er að segja til um hvar endar, eða hvort sú þróun endi nokkuð yfirleitt.
Að auki blasir við hverjum heilvita manni að hugarfar í Ísrael er orðið helsjúkt, þorri fólks þar horfir með velþóknun á barnamorð og limlestingar, kynferðislegar pyndingar, geðþóttadauðarefsingar og margvíslegan annan viðbjóð sem auðvelt er að finna í fréttamiðlum öðrum en meginstraumnum.
Við lifum á ögurstund. Íslenskir ráðamenn verða að þora að tala upphátt, fylgja Spánverjum að málum og gera miklu fleira en að ganga til liðs við málsókn Suður Afríku.
Birtist á Facebook síðu höfundar.