Árið er 1947 og Abdullah Mohamed, 7 ára palestínskur drengur, býr í þorpinu Deir Yassin með fjölskyldu sinni, foreldrum og 4 systkinum. Forfeður þeirra hafa búið þarna mann fram af manni með geitur og hesta og stundað akuryrkju. Lífið er erfitt og allir þurfa að leggja sitt af mörkum og litli Abdullah er þegar farinn að fylgja geitunum eftir á daginn og reka þær heim þegar degi hallar þar sem þeir gefa af sér dýrmæta geitamjólkina. Blikur eru þó á lofti því að aðkomumenn Gyðinga hafa verið að færa sig upp á skaftið og þrengja að íbúum. Þeir hafa keypt upp fjölda jarða og beitt hörku við að eignast jarðir með hótunum og jafnvel ofbeldi til þess að hrekja fólk burt af jörðum sínum. Fram að þessu hefur þó breska setuliðið haldið þeim í skefjum og stöðvað meiriháttar ofbeldisverk þeirra.
Breyting verður á þann 29. nóvember 1947 þegar Sameinuðu Þjóðirnar samþykkja ályktun um skiptingu Palestínu milli arabískra íbúa og innfluttra Gyðinga. Aröbum sem eru 2/3 íbúa er úthlutað 43 % lands en Gyðingum sem eru 1/3 íbúa 56 % landsins. Þessi rangláta skipting er réttlætt með því að Gyðingaþjóðin sé upprunnin í Palestínu fyrir þúsundum ára og með útrýmingarherferð Nasista á hendur þeim undanfarin ár. Sameinuðu þjóðirnar beina því til umboðsstjórnar Breta sem ábyrgðaraðila á svæðinu og allra aðildarþjóða Sameinuðu þjóðanna að samþykkja og framfylgja framtíðar skiptingu Palestínu. Í grein 73b í stofnsamningi samtakanna stendur þó að á svæðum þar sem íbúar hafa ekki náð fullri sjálfsstjórn skulu ábyrgðaraðilar ýta undir þróun sjálfsstjórnar íbúa á svæðinu og aðstoða þá við þróun frjálsra pólitískra stofnana í samræmi við aðstæður á hverjum stað.
Forystumenn Gyðinga samþykkja þessa áætlun sem algjört lágmark en forystumenn Palestínu Araba og Arababandalagsins hafna hins vegar ályktuninni með þeim rökstuðningi að þetta sé ósanngjarnt gagnvart Aröbum m.t.t. hlutfallslegs fjölda þjóðanna. Þeir hafna einnig hvers konar skiptingu á landinu og draga í efa valdsvið Sameinuðu Þjóðanna með vísan í áðurnefnda grein. Eftirleikur þessarar niðurstöðu eru fagnaðarlæti hjá Gyðingasamfélaginu en óánægja meðal Araba. Aðfluttir Gyðingar framfylgja stefnu Zíonismans sem er kynþáttabundin þjóðernisstefna sem fram kemur á seinni hluta 19. aldar. Hún byggist á að Gyðingar eigi sögulegan rétt á búsetu í Palestínu með eins mörgum Gyðingum og eins fáum Aröbum og mögulegt er. Stuttu síðar brjótast út óeirðir sem þróast í meira ofbeldi. Morð, hefndir og dráp á tugum manna á báða bóga fylgja í kjölfarið. Þar sem Bretar hafa dregið úr afskiptum sínum eftir ákvörðun Sameinuðu þjóðanna er enginn til að stilla til friðar.
Hryðjuverkasamtök innan Gyðingasamfélagsins, Irgun og Lehi, telja að arabískir uppreisnarmenn hafi aðsetur í þorpinu Deir Yassin. Þann 9. apríl 1948 nálgast þeir þorpið úr öllum áttum og ráðast að þorpsbúum með handsprengjum og skotvopnum og drepa 107 manns þ.á.m. konur og börn. Hluti íbúa er handtekinn og fluttur til V-Jerúsalem þar sem þeir eru líflátnir. Öllum öðrum íbúum er hrundið á flótta og þorpið tæmt af fólki. Ári eftir þetta hefur þorpið fengið nýja íbúa af Gyðingaættum. Abdullah litla og föður hans tekst að flýja en móðir hans og systkini eru drepin í árás vígasveitanna. Ásamt fleiri þorpsbúum tekst þeim að flýja til Egyptalands þar sem þeirra bíður vist í flóttamannabúðum næstu árin. Faðir hans gengur í lið með skæruliðum Fedayeen sem samanstendur af flóttamönnum frá Palestínu sem ekki eiga afturkvæmt og stunda skæruliðaárásir á her Ísraels á árunum 1950-60 til að hefna fyrir fjöldamorð Gyðinga og brottrekstur frá Palestínu. Þessar hersveitir eru illa búnar og mega sín lítið gegn þungvopnuðum hersveitum ísraelska hersins sem leggur áherslu á gagn-hefndaraðgerðir með „high-blood cost“ og í einni slíkri árás er faðir hans drepinn.
Árið er 1964 og Abdullah, sem nú er fullorðinn, gengur í lið með skæruliðahópum PLO með aðsetur í Egyptalandi, Jórdaníu, Sýrlandi og Líbanon. Þeir búa í flóttamannabúðum og lifa við nauman kost og þeirra eina hugsjón er að hefna fyrir yfirgang þessara nýju íbúa, fjöldamorð á þeirra nánustu og takmarkalausa grimmd. Eftir dauða Yasser Arafats árið 2004 er PLO ekki lengur ráðandi í andspyrnu gegn ofríki Ísraela. Abdullah sem kominn er á miðjan aldur kemst í samband við róttækari arm skæruliða sem kalla sig Hamas. Í kosningum fyrir sjálfsstjórnarsvæðið Gaza bjóða þeir fram og ná meirihluta í stjórn þess árið 2007 í óþökk Ísraela.
Í desember 2008 hefur Ísrael stríð á Gaza með árás á Hamas og drepur 12-1400 manns og leggur 46 þús. heimili í rúst. Fjölskylda Abdullah er meðal fórnarlambanna og kona hans og 3 dætur farast en Abdullah og 15 ára sonur hans Mahmoud komast lífs af. Mahmoud gengur í lið með Hamas og í október 2023 gera samtökin vel undirbúna árás á almenna borgara í S-Ísrael, drepa 1195 manns og nema á brott 251 gísl. Framhaldið þekkja allir sem „high-blood cost“ hefndaraðgerð Ísraels.
Hver ætlar að setjast í dómarasætið ?
Birtist í Morgunblaðinu.