Það var ótrúlegur styrkur að sjá hversu mörg komust á mótmælafundinn á Austurvelli áðan. Þegar Félagið Ísland-Palestína bað mig um að segja nokkur orð við það tækifæri fékk ég sting í magann, hvernig á að vera hægt að ná utan um þetta?
En ég gerði mitt besta þó það væri auðvitað svo miklu meira hægt að segja. Til dæmis um börnin sem eiga að vera að komin til Íslands, en sitja föst á Gaza. Börnin sem eiga samþykkta fjölskyldusameiningu til Íslands og bíða og vona, hvern einasta dag, að nú verði þeim bjargað. Þegar við komum til pabba á Íslandi munum við fá góðan mat, segja þau. Þegar við komum til pabba á Íslandi getum við aftur farið í skóla, sofið í rúmi. En ekkert heyrist frá íslenskum stjórnvöldum. Þetta er um hundrað manna hópur. Hvar er flugvélin þeirra, Katrín Jakobsdóttir?
Ég var beðin um að deila ræðunni og hún kemur hér að neðan. Myndinni stal ég af vísi.
***************
Þetta eru sögulegir tímar í þeim allra versta skilningi sem hægt er að leggja í þau orð. Nú, svo skömmu fyrir jól er heimurinn enn neyddur til að horfa upp á fordæmalausa slátrun saklausra barna og borgara sem hafa ekkert unnið sér til saka annað en að hafa fæðst í Palestínu.
Þetta er óbærilegt. Rykið í andlitum blæðandi barna er óbærilegt. Raddirnar sem berast undan húsarústum eru óbærilegar. Myndir af smábörnum sem ráfa um í leit að látnum foreldrum sínum og systkinum eru óbærilegar. Það er óbærilegt að palestínskir foreldrar séu farnir að skrifa nöfn barna sinna á fætur þeirra, svo hægt sé að bera kennsl á þau eftir dauðann.
Hversu slæmt getur þetta orðið? spyr maður sig á hverjum degi.
Á hverjum degi er sama svarið:
Verra.
Verra.
Verra.
Nú eru fórnarlömbin um 17.700 og þar af eru tæpur helmingur börn.
Í vopnahlénu fundust lík fyrirbura á barnaspítala í Norður Gaza sem urðu eftir þegar ísraelskir hermenn ráku starfsfólkið út með valdi. Við sendum eftir þeim, sögðu þeir. En þeir fóru. Sendu engan. Og þarna voru þau eftir ein. Pínulítil börn með pínulitlar bleyjur. Þegar þau fundust voru lík þeirra orðin svört, villihundar búnir að tæta einhver þeirra í sig, bleyjurnar fullar af saur af því að þau voru ein, dögum saman voru þau ein.
Hversu slæmt getur þetta orðið?
Verra.
Hryðjuverkamenn eru enn að ráðast á Ísrael, segir Bjarni Benediktsson. Þess vegna hefur verið “eitthvað mótsvar” hjá Ísrael. Hryðjuverkamennirnir nota almenna borgara sem skildi og það gerir þetta flóknara. Bjarna orð, ekki mín.
Nú spyr ég þig – Bjarni Benediktsson.
Er þá réttlætanlegt að drepa fimm ára börn af því að hryðjuverkamenn gætu verið að fela sig bak við þau?
Voru fyrirburarnir sem ísraelskir hermenn myrtu hryðjuverkamenn?
Var Ísrael að reyna að verjast hryðjuverkamanni þegar þau skutu átta ára barn í bakið þegar hann var að spila fótbolta við vini sína á Vesturbakkanum?
Hversu lengið ætlið þið að nota ódæðin þann 7. október sem réttlætingu á ódæðunum þann 8. október, 9. október, 10. október – hvernig getið þið réttlætt 64 daga af óbærilegum ódæðum?
Hversu slæmt getur þetta orðið?
Verra.
En verst af öllu er þó þögnin. Að horfa upp á ráðamenn þessa heims þramma áfram, öxl í öxl og þegja. Enn verra er að þegar þau loksins rjúfa þögnina – þá eru þau að reyna að ljúga því að okkur að þetta sé í raun eðlilegt. Að þetta snúist um sjálfsvörn. Risavaxið hernaðarveldi gegn kúgaðri þjóð, læstri inni í gettói, fullri af smábörnum.
Bandarísk stjórnvöld komu í veg fyrir vopnahlé á föstudaginn. Hvers vegna? Jú, þau segjast vera að hugsa um ísraelsku gíslana. Að verði vopnahlé muni Hamas enn vera með gíslana.
Vita bandarísk stjórnvöld ekki að fjölskyldur gíslanna í Ísrael hafa kallað eftir umsvifalausri afsögn Netanyahus af því að hann hefur engan áhuga á frelsun þeirra?
Auðvitað vita bandarísk stjórnvöld það. Rétt eins og íslensk.
Já, en Ísrael verður að verja sig. Hamas fela sig í sprengjuheldum undirgöngum undir öllu Gaza, segja fjölmiðlar og vestræn stjórnvöld. Skýla sér bakvið almenna borgara.
Er það þess vegna sem verður að SPRENGJA hvern spítalann af öðrum í tætlur? Flóttamannabúðirnar? Skólana? Sjúkrabílana? Blaðamennina? Heilu íbúðargöturnar? Skiljið þið hvert ég er að fara? Sprengja og sprengja þegar hryðjuverkamennirnir eiga að hafast við í sprengjuheldum undirgöngum?
Hvers vegna er mataraðstoð ekki hleypt inn? Hvers vegna er Alþjóða Heilbrigðisstofnunin neydd til að tæma gáma með nauðsynlegum sjúkravörum? Jú, af því að það er yfirlýstur tilgangur Ísraelsstjórnar að þurrka Gaza út af kortinu. Svelta þau og myrða. Þau hafa sjálf sagt það margoft. Við viljum losna við alla Palestínubúa. Þau eru aumari en nokkur skepna. Við munum eyða þeim öllum. Hafið þið ekki lesið um svona talanda í sögubókunum?
Veit Bjarni Benediktsson þetta ekki?
Veit Evrópusambandið þetta ekki?
Veit Joe Biden þetta ekki?
Jú, hann veit. Þau vita. Þau vita þetta öll. En þau geta ekki sagt: Sjáið til, Netanyahu er að fremja þjóðarmorð og við viljum ekki gera neitt af því að diplómatísk kurteisi, verðbréfamarkaðir og peningar skipta meira máli en þúsundir ofan á þúsundir barna með brostin augu í Palestínu. Barna sem munu aldrei, aldrei aftur eiga afmæli.
Hversu slæmt getur þetta orðið?
Verra.
Bjarni Benediktsson vill ekki láta kalla sig barnamorðingja en hann er samt tilbúinn að standa á fjalli af léréftklæddum líkömum fimm ára barna frekar en að kalla sendiherra Bandaríkjanna strax á sinn fund og láta hann heyra það. Frekar en að slíta stjórnmálasambandi við Ísrael.
SKAMMASTU ÞÍN. Við vitum. Sjáum í gegnum þig. Munum aldrei gleyma.
Við munum ekki gleyma blóðinu á höndum þínum.
Ykkar ALLRA sem sitjið nú í ríkisstjórn Íslands.
Við munum ekki gleyma blóðinu á höndum ykkar í hvert einasta sinn sem þið þiggið embættisbitlinga, þykist ætla að hafa eitthvað að segja um mannréttindi og lýðræði.
Við megum ekki gleyma. Við megum ekki þegja. Við verðum að fylla upp í þessa ærandi þögn með öllum þeim hávaða sem við getum framkallað. Það er kannski stundum óþægilegt, rétt eins og það var óþægilegt fyrir fólk að mótmæla þegar nasistar frömdu þjóðarmorð á gyðingum. En er eitthvað verra að senda börn í gasklefa eða grafa þau undir húsarústum? Skjóta þau í bakið?
Hversu slæmt getur þetta orðið?
Verra.
Verra.
Verra.
Þess vegna segjum við:
Veitið öllum Palestínubúum á Íslandi vernd, STRAX!
Bjargið fólki á Gaza með samþykkta fjölskyldusameiningu til Íslands, STRAX!
Slítið svo STRAX stjórnmálasambandi við Ísrael!
Stöðvið þjóðarmorðið STRAX!
Birtist á FB síðu Félagsins Ísland-Palestína.
