Þessi frétt er búin að sitja í mér af ýmsum ástæðum. Þekkingar- og dómgreindarleysið sem litar þennan gjörning er auðvitað ekkert nýtt og kemur svo sem ekki á óvart, því miður. En það væri óskandi að fólk sem er búið að vera í pólitík árum og áratugum saman hefði burði til að horfa gagnrýnum augum á samhengið sem það lifir í.
Frumvarpið um bann við afneitun helfarar Nasista var lagt fram 2020-2021. Til rökstuðnings fyrir þessu framtaki var „ægileg þróun í Evrópu undanfarin 1-2 ár“ nefnd, og að sýnt væri að afneitun helfararinnar gæti haft alvarlegar afleiðingar. Uppgangur nasisma í Evrópu hófst reyndar fyrir löngu síðan og hann varð ekki til vegna þess að tjáningarfrelsið hefði verið skert með boðum og bönnum enda hafði það sýnt sig og sannað í Evrópu allri, og Þýskalandi sérstaklega, að skert tjáningarfrelsi hefur vondar afleiðingar.
Jarðvegurinn sem nýnasisminn í Þýskalandi spratt úr var þöggun. Þöggun á helförinni og framferði heillar þjóðar sem gerði helförina mögulega. Þriðja ríkið og helförin var ekki rædd. Þátttaka almennings var ekki rædd. Fræðsla og umfjöllun var í lágmarki. Ekkert ítarlegt uppgjör átti sér stað. Enda var fyrsti eftir-stríðsára nýnasistaflokkurinn í Vestur Þýskalandi, SRP, stofnaður strax 1949. Hann var síðan bannaður 1952. Næsti nasistaflokkur, NPD, var stofnaður 1964 og er enn starfandi. AfD er ekkert nýnæmi og spratt ekki úr engu heldur er hluti af pólitískri samfellu.
Helförinni á Gasa hefur verið afneitað og hún studd af flestum Evrópuríkjum í á þriðja ár
Í ljósi þessa er erfitt að kaupa það að það sé samviskubit sem geri það að verkum að Þjóðverjar skipi sér fremstir í flokki með gyðingunum í Ísrael við að myrða Palestínumenn í dag. Það er nærtækara að ætla að í andrúmslofti þar sem ekkert ítarlegt uppgjör átti sér stað og hugmyndafræði nasismans var aldrei upprætt, hafi gyðingaandúðin líka fengið að lúra undir yfirborðinu.
Aukin gyðingaandúð undangengin ár spratt úr þessu samhengi. Eftir að hafa mallað í áratugi undir yfirborðinu, náði hún upp á yfirborðið hönd í hönd við sívaxandi nasisma. En fyrst og fremst hefur gyðingaandúðin í dag vaxið samhliða því að gyðingar Ísrael eru að fremja þjóðarmorð í Palestínu.
Það er eitt að leggja fram frumvarp um bann við afneitun helfararinnar í Þýskalandi árið 2020/21 en dusta rykið af því árið 2026, þegar helför Ísrael á Gasa hefur varað í á þriðja ár er í alla staði óskiljanlegt dómgreindarleysi.
Helförinni á Gasa hefur verið afneitað og hún studd af flestum Evrópuríkjum í á þriðja ár. Þjóðarhreinsanir Ísrael í Palestínu hafa staðið yfir í 78 ár. Íslensk ríkisstjórn, með utanríkisráðherra í broddi fylkingar, tók lengst af fullan þátt í að afneita og með aðgerðarleysi: styðja þjóðarmorð Ísrael á Gasa.
Árið 2026, þegar helförin á Gasa hefur verið í beinni útsendingu í á þriðja ár, þykir ríkisstjórn Íslands og þeim sem fara fyrir þessum gjörningi liggja beint við að halda minningardag þýsku helfararinnar hátíðlegan og banna afneitun á þýsku helförinni með lögum. Leggja áherslu á að fræða fólk um þýsku helförina.
Hvað með yfirstandandi helför í Palestínu? Hvað með fræðslu um þjóðarmorð Ísrael í Palestínu?
Þátttaka íslenska ríkisins í máli Suður Afríku er vissulega stórt skref í rétta átt. En á sama tíma styður ríkisstjórn Íslands Ísrael með endurteknum samningum við RAPYD.
Hvernig væri að læra sannarlega af sögunni og horfast í augu við það sem er að gerast í dag, í beinni útsendingu? Hætta að afneita þjóðarmorði sem á sér stað í dag? Taka fulla, meðvitaða afstöðu gegn því með öllum tiltækum aðgerðum?
Þátttaka íslenska ríkisins í máli Suður Afríku er vissulega stórt skref í rétta átt. En á sama tíma styður ríkisstjórn Íslands Ísrael með endurteknum samningum við RAPYD. Hún styður Ísrael með því að slíta ekki stjórnmála- og viðskiptasambandi við Ísrael, ríki sem hún er í málsókn gegn. Hún hleypir ísraelskum hermönnum inn í landið, fólki sem hingað kemur til að kæla sig á milli fjöldamorða á Gasa. Tvískinnungurinn er alger.
Birt á Facebook síðu höfundar.
Vinnuskilgreining IHRA á gyðingahatri – Andstaða gegn síonisma er ekki gyðingaandúð