Frá því að Ísraelsríki var stofnað hafa Palestínumenn þurft að þola yfirgang og morð af höndum zíonistanna. 200 þúsund Palestínumenn hafa verið drepnir frá árinu 1948, 750 þorp þeirra hafa verið þurrkuð af yfirborði jarðar. 750 þúsund menn voru gerðir brottrækir frá heimilum sínum. Jenin, Rafah og Gaza eru bara nýjustu dæmin. Svo er Ísrael með hertekið land frá bæði Líbanon og Sýrlandi. Allar aðgerðir Ísraelsríkis eru gerðar með stuðningi, beinum og óbeinum, frá Vesturlöndum.
Svo er fjölmiðlum fyrir að þakka að fólk á Vesturlöndum hefur loksins séð sannleikann um þetta ríki sem búið hefur verið til með stuðningi þeirra. En samt eru enn mörg ríki sem þora ekki að styggja Ísrael vegna hagsmuna sinna og sökum hræðslu við gyðinga og zíonista. Hjá okkur á Íslandi birtir utanríkisráðuneytið fordæmingu á aðgerðum Ísraels í Palestínu. En var þessi fordæming afhent einhverjum í Ísrael eða Bandaríkjunum, verndara Ísraels, eða var þetta bara birt hér innanlands? Er ekki kominn tími til að stoppa þessi skrímsli sem í raun eru mesta ógnin við heimsfriðinn? Hvað þarf margar ályktanir frá Sameinuðu þjóðunum til að ríkisstjórnir heims stoppi þessa stríðsglæpi, eyðileggingu og blóðbaðið sem Ísrael stendur fyrir?
Var Saddam Hussein verri en Ariel Sharon? Saddam hefur ekki jafn mörg mannslíf á samviskunni og Sharon. Er þessi stríðsglæpamaður (hann var dæmdur af ísraelskum dómstóli) verðugur til að hitta eða heimsækja eitthvert Evrópuland? Eru Radovan Karadzic, Milosevic eða aðrir stríðsglæpamenn verri menn en Ariel Sharon og glæpagengi hans? Ég held að tími sé til kominn að stjórnmálamenn séu sjálfum sér samkvæmir, taki á málinu af festu og slíti öllu sambandi við Ísraelsmenn þar til þeir geta hagað sér eins og friðelskandi þjóð. Við erum öll búin að fá nóg.
Ítrekað berast umheiminum fréttir af hryllilegum árásum Ísraelsmanna á Palestínumenn. Svo virðist sem ríkisstjórn Ísraels trúi því að með meiri hörku sé hægt að hrekja Palestínumenn frá byggðum sínum. Þá skiptir ekki máli hvernig að málum er staðið við að losna við Palestínumenn, jafnvel þó þeir séu drepnir. Allt er gert til að koma í veg fyrir að þeim verði nokkurn tímann gert kleift að stofna sitt eigið ríki eða snúa aftur til síns heima. Ljóst má vera að aðgerðum Ísraelsmanna er ekki lokið enn.
Birtist fyrst á Vísi.
