Yfirlýsing forsætisráherra og utanríkisráðherra um Palestínu er góðra gjalda verð. Það er þó ekki lengur mögulegt að stefna að tveggja ríkja lausninni eins og málin standa í dag. Ísraelsmenn hafa komist upp með landrán og morðhrinur í áratugi og hyggjast þeir yfirtaka allan Vesturbakkann – og þessa dagana ganga þeir mjög hart fram. Að undanförnu hafa Palestínumenn verið hraktir úr ríflega 30 þorpum og fjöldi manns drepinn.
Það blasir við öllum sem fylgjast með málum í Palestínu að áður en að tveggja ríkja lausnin, eða nokkur önnur raunveruleg lausn er möguleg, þá verður að stöðva Ísraelsmenn og beita þá viðurlögum. Að öðrum kosti halda þeir áfram að brjóta alþjóðlög og færast í aukana, fleiri Palestínumenn verða drepnir í þjóðarmorðinu og möguleikar á ríki Palestínumanna minnka enn frekar.
Með fáránlegum og glæpsamlegum yfirlýsingum Trumps um brottflutning Gazabúa og eignarhald hans á „ríveríunni“ fjarlægist enn hugmyndin um ríki Palestínumanna.
Kristrún og Þorgerður verða að stíga niður fæti og framfylgja alþjóðasamningum með refsiaðgerðum gegn Ísrael. Með því að hefja skörulega baráttu á vettvangi Norðurlanda og Evrópu fyrir sniðgöngu og refsiaðgerðum geta þær hugleitt tveggjaríka lausn eða aðrar lausnir, en með áframhaldandi síbilju um vandamálið og lausnir án beinna aðgerða gerist ekkert nema framhald þjóðarmorðsins.
Birtist fyrst á Facebook.
