Félagið Ísland-Palestína skipulagði hópgöngu frá Hallgrímskirkju, niður Skólavörðustíg og Laugarveg og endaði að lokum á Lækjartorgi. Gangan fór fram laugardaginn 7. júní 2025 og lagt var af stað kl. 14:00.
Gangan var þögul alla leið og aðeins heyrðist þungur trommusláttur, við og við, sem undirstrikaði sorgina og lýsti kannski deyjandi hjartslætti þeirra sem hafa orðið fyrir sprengjum Ísraela og liggja í húsarústum bjargarlaus án nokkurrar vonar um hjálp.
Í fararbroddi göngunnar var hópur einstaklinga sem gengu í röð, hver með sitt fórnarlamb í fanginu innvafið í hvítt lín sem táknaði börnin sem hafa verið myrt á Gaza.
Á Lækjartorgi fór síðan fram gjörningur þar sem „börnin“ voru lögð á stéttina fyrir framan Héraðsdóm Reykjavíkur og þungar drunur frá sprengjum og skerandi barnsgrátur fóru að heyrast úr hátölurum á hverju horni torgsins og gáfu að einhverju leyti til kynna það sem Palestínumenn þurfa að búa við alla daga. Sprengjur féllu í formi hveitipoka og blóð sprautaðist frá varnarlausum og viðkvæmum barnslíkömunum.
Engin orð ná lengur að lýsa þeim hrylling sem við horfum á daglega í beinni útsendingu frá Gaza og Vesturbakkanum. Sú þjóðernishreinsun og það þjóðarmorð sem á sér stað þarna er ógerlegt nema með dyggum pólitískum, efnahags- og hernaðarlegum stuðningi ráðamanna á Vesturlöndum. Samsekt ráðamanna er augljós og þeirra bíður vonandi réttarhöld í tímans rás í samræmi við viðeigandi alþjóðalög.
