Hernám Ísraels yfir allri Palestínu hefur staðið í 48 ár, en 67 ár eru síðan það hófst með hernámi Ísraels á fjórum fimmtu hlutum landsins, en Sþ höfðu ætlað gyðingum helming þess. Hernám Palestínu verður æ grimmilegra um leið og stöðugt verður ljósar að ráðandi öfl í Ísrael ætla sér ekki að eftirláta Palestínumönnum neitt af landi sínu til að reisa sjálfstætt, lífvænlegt og fullvalda ríki.
Umheimurinn horfir upp á þjóðarmorð í Palestínu með bæði augu lokuð og heldur fyrir eyru. Stríðsglæpir Ísraels í árásarstríði gegn íbúum Gaza í fyrrasumar virðist gleymdir, þótt yfir 2200 hafi verið drepnir, þar af 551 barn. Drápin sem nú eiga sér stað, einkum í Austur-Jerúsalem og á Vesturbakkanum, eru grimmilegri en um langt skeið. Vestrænir fjölmiðlar, þar á meðal RÚV og BBC tala einkum um hnífastunguárásir, en níu Ísraelsmenn hafa fallið síðan 1. október. Á sama tíma hafa yfir sjötíu Palestínumenn verið drepnir, flest ungt fólk og börn; margir teknir af lífi með köldu blóði af her og lögreglu, þótt auðvelt væri að afvopna og handtaka viðkomandi og færa fyrir dómtól. En nei, stefna Netanyahus er að drepa fólk á staðnum, án dóms og laga.
Þessu verður Ísland að mótmæla. Mótmæli ein og sér hafa þó litla þýðingu. Fylgja þarf þeim eftir með aðgerðum sem eftir er tekið. Áhrifarík og friðsöm aðgerð til að hafa áhrif á stefnu Ísraels til góðs er að sniðganga Ísrael á öllum sviðum þar til hernáminu linnir og Palestína verður frjáls. Kjósendur hljóta að gera þá kröfu til borgarfulltrúa að þeir geri grein fyrir því af hverju meirihlutinn tók þátt í því, með borgarstjórann í broddi fylkingar, að ógilda fyrri ákvörðun borgarstjórnar um að sniðganga vörur frá Ísrael meðan hernámið varir.
RÚV og aðrir fjölmiðlar kepptust við að lýsa samþykkt borgarstjórnar frá 15. september, að tillögu Bjarkar Vilhelmsdóttur, sem barnalegri, hlægilegri, illa undirbúinni, hættulegri, ólöglegri; í andstöðu við utanríksstefnu Íslands kom frá Gunnari Braga. Allt var þetta órökstutt og öðrum sjónarmiðum ekki hleypt að. Halldór Auðar Svansson borgarfulltrúi hefur leitað skýringa hjá utanríkisráðuneyti en engin svör borist.
Borgarstjórn virðist hafa látið undan þrýstingi erlendis frá sem innanlands og látið kúga sig til breyttrar afstöðu. Harkaleg viðbrögð Ísraelsstjórnar sanna að sniðganga er áhrifarík aðgerð. Slík aðgerð nýtur stuðnings friðarsinnaðra bandarískra og ísraelskra gyðinga og er orðin að alþjóðlegri hreyfingu undir palestínskri forystu, sem dregur lærdóma af sigursælli baráttu gegn aðskilnaðarstefnunni í Suður-Afríku.
Birtist fyrst í Frjáls Palestína.
