Yfirlýsing Abbas forseta Palestínu um að gefa ekki kost á sér til endurkjörs lætur ekki mikið yfir sér, en hún markar tímamót og uppgjör. Uppgjörið felur í sér að forysta PLO hefur gefist upp á biðinni eftir því að Bandaríkjastjórn rækji hlutverk sitt sem málamiðlari í deilu Ísraels og Palestínu. Þar er um mjög ójafnan leik að ræða þar sem annars vegar er vopnlaus þjóð sem búið hefur við hernám í 42 ár og raunar allt frá árinu 1948.
Hins vegar er hernámsveldi sem beitir fullkomnasta her og leyniþjónustu miskunnarlaust. Það lætur eins og alþjóðalög um meðferð íbúa á herteknum svæðum, lög um mannúð og mannréttindi og Alþjóðadómstóllinn í Haag komi því ekki við. Þannig heldur Ísraelsstjórn áfram byggingu aðskilnaðarmúrsins þvert á úrskurð dómstólsins og þjóðir heims horfa aðgerðarlausar á óskapnaðinn sem útilokar að sjálfstætt ríki Palestínumanna verði til.
Þau tímamót er nú að verða að tiltrú Palestínumanna á tveggja ríkja lausninni, Ísrael og Palestínu hlið við hlið í friði, farsæld og gagnkvæmri virðingu, er að líða undir lok. Ljóst er af öllu framferði Ísraelsstjórnar, og þá er sama hvaða flokkar eru við völd, að enginn vilji er til alvöru viðræðna með réttlátan frið fyrir augum.
Stöðugt er haldið áfram að herja á palestínsku þjóðina og hafa af henni landið og lífsmöguleika. Palestínumenn standa frammi fyrir því að finna nýjar leiðir til að ná rétti sínum. Fyrsta verkefni þeirra er að ná saman, binda endi á innbyrðis illdeilur Fatah og Hamas, endurskipuleggja frelsissamtökin PLO og efna til kosninga á nýju ári.
Á þessum tímamótum þurfa Sameinuðu þjóðirnar, einstakar ríkisstjórnir og félagasamtök að sameinast um að veita palestínsku þjóðinni fulltingi til að ná rétti sínu til fullveldis, sjálfsákvörðunar og mannréttinda. Alþjóðasamtökin völdu 29. nóvember til að minna okkur öll á þetta verkefni, samstöðu með palestínsku þjóðinni. Leggjum okkar að mörkum.
