Vestrænir fjölmiðlar hafa fjallað mikið um hið hryllilega morð írönsku „siðgæðislögreglunnar“ á Masha Amini, ungri stúlku sem huldi ekki hár sitt með réttum hætti. Engan skyldi undra þótt fólk víða um heim, þar með talin vestræn stjórnvöld og fjölmiðlar, brygðust harkalega við þessum glæpum klerkastjórnarinnar. Rætt er um að auka viðskiptaþvinganir gegn Íran – enn meira en þegar er gert.
„Ísraelsher hefur drepið 2300 palestínsk börn frá aldamótum“
Þegar slíkir atburðir gerast verður stuðningsfólki Palestínumanna ætíð hugsað til þess hvernig Ísrael, sem ástundar daglega hryðjuverk og fremur morð, kemst enn sem fyrr í gegnum nálarauga hinna herskáu „mannréttindahugsuða“ sem berja sér á brjóst þegar hryðjuverk Rússa og Írana ber á góma.
Fjögur börn drepin af yfirvöldum í Ísrael
Á sama tíma og írönsk yfirvöld drápu Masha Amini drap her Ísraels fjögur börn á Vesturbakkanum í Palestínu.
Mahmud Sus, 18 ára, var skotinn í hálsinn; Adel Ibrahim, 14 ára, var skotinn í höfuðið; Mahdi Ladadweh, 17 ára, var skotinn í mjaðmagrind; Ahmad Daragmah, 16 eða 17 ára, var skotinn í höfuðið. Mahdi Sammoudi, 12 ára, skotinn í kviðinn í lok september, lést á sjúkrahúsi á sama tíma og þessi morð áttu sér stað. Margir aðrir særðust, annað hvort í árásinni á Jenin flóttamannabúðirnar þar sem brynvarðir bílar Ísraelshers, þyrlur, drónar og jarðýtur komu við sögu, eða annars staðar á Vesturbakkanum.
Helstu fjölmiðlar Vesturlanda fjalla ekki um þessi morð, stjórnvöld á Vesturlöndum breyta engu í stefnunni gagnvart Ísrael sem enn nýtur bestu kjara í viðskiptum og er órjúfanlegur hluti af valdakerfi Vesturlanda. Og hér liggur skýringin: síonistar – morðingjarnir á Vesturbakkanum – eru fastagestir í veislusölum diplómatanna, fulltrúa ríkjanna sem telja sig í framverði baráttunnar fyrir mannréttindum og lýðræði.
Íslensk stjórnvöld beita sér um þessar mundir á vettvangi Sameinuðu þjóðanna gegn mannréttindabrotum Kína í Xinijang-héraði. Íslensk stjórnvöld vilja að Sameinuðu þjóðirnar ræði svarta skýrslu um meinta glæpi Kína gegn mannkyninu. Ísland hefur einnig hafið máls á vettvangi SÞ á mannréttindabrotum yfirvalda í Sádi Arabíu.
Nýlega hafa fjögur viðurkennd mannréttindasamtök birt skýrslur sem sýna svart á hvítu hvernig stjórnvöld í Ísrael brjóta alþjóðalög með beitingu aðskilnaðarstefnu (apartheid) gegn Palestínumönnum. Ísland hefur ekki krafist umræðu um þessar skýrslur. Hvað veldur?
Þingmenn ræða ástandið í Íran
27. október ræddu alþingismenn ástandið í Íran og sagði utanríkisráðherra það vera skyldu okkar að sýna samstöðu og nota rödd Íslands til að tala máli mótmælenda í Íran á alþjóðavettvangi. Það er skýr afstaða og rétt. Þorbjörg Sigríður Gunnlaugsdóttir þingmaður Viðreisnar sagði að það skipti máli að frá Alþingi „heyrist hátt og snjallt að við höfum fylgst með því sem er að gerast og við heyrum og sjáum og að við stöndum með almenningi í Íran. Opinber fordæming íslenskra stjórnvalda skiptir máli og fordæmingin á að haldast í hendur við aðgerðir eins og frystingu eigna og ferðabann til Evrópu.“ Þetta eru sterk orð og mikilvæg — en hvenær fáum við að heyra samskonar yfirlýsingar frá þessum þingmönnum varðandi ofbeldi Ísraelsstjórnar gegn almenningi í Palestínu?
Eru morð síonistanna í Ísrael á 2300 palestínskum börnum frá síðustu aldamótum ekki einnar umræðu virði?
Birtist fyrst í Frjáls Palestína.
