Þriðjungur fórnarlambanna eru börn, en það eru á fjórða hundrað börn og um eitt hundrað konur sem misst hafa lífið í aðgerðum hersins. Um fjögur þúsund manns eru særð og margir mjög alvarlega. Þá eru ótalin börn og unglingar sem enn lifa, en hafa fengið varanlega röskun á sálarlífi vegna sprengjuregnsins og þeirra stöðugu skelfinga sem Ísraelsher er vísvitandi að orsaka. Þetta brýtur líka marga fullorðna niður.
Terror þýðir skelfing og markmið þessara árása og slátrunar á óbreyttum borgurum er að terrorisera, skapa ástand skelfingar og ofsahræðslu þannig að fólk flýr burt ef það mögulega getur. Þetta eru í grunninn sömu aðferðirnar og þær sem hryðjuverkahópar gyðinga beittu við stofnun Ísraelsríkis til að hrekja sem flesta Palestínumenn burt af heimilum sínum og helst úr landi.
Það voru þjóðernishreinsanir þess tíma og nú 60 árum síðar eru þær enn í gangi, nú af miklum ofsa, en hafa verið til staðar allan tímann í meira og minna mæli. Óhugnalegt grimmdaræði ísraelskra stjórnvalda og hers þeirra, sem heimurinn hefur þurft að horfa upp á síðustu daga og vikur, hefur vakið upp þær raddir að Ísraelsstjórn sé að fremja þjóðarmorð í Palestínu.
Við hljótum að mótmæla stríðsglæpum Ísraelshers og gera þær kröfur til ríkisstjórnar Íslands að hún geri allt sem í hennar valdi stendur til að að knýja Ísraelsstjórn til að láta af árásum á Gaza og binda endi á herkvína sem staðið hefur í eitt og hálft ár. Sýnum þjáðri þjóð samstöðu og eflum neyðaraðstoð við íbúana á Gazaströnd.
