Hvað get ég gert?

Þessi grein er byggð á ræðu Yousef Tamimi á stórfundi FÍP í Háskólabíói 5. nóvember 2023

Þjóðarmorð og þjóðernishreinsanir Ísraels í Palestínu er skelfileg stað­reynd. Núna, árið 2023, e­rum við að horfa á í beinni útsendingu þjóðernishreinsanir ísraelskra stjórnvalda með fullum stuðningi Bandaríkjanna, ESB og Íslands. En við skulum hafa það á hreinu að stuðningur íslensku ríkisstjórnarinnar á þjóðarmorðum í Palestínu er ekki í mínu nafni. Þótt að utanríkisráðherra Íslands eigi erfitt með meðtaka staðreyndir, opinberar yfirlýsingar ísraelska stjórnvalda um þjóðernishreinsanir og það að hann eigi erfitt með að skilgreina hvað árás sé, þá er staðreyndin sú að flestar stofnanir, allt frá Amnesty til sérstaks eftirlitsmanns Sameinuðu þjóðanna, eiga ekkert sérstaklega erfitt með þetta. Ísrael er að ráðast á Palestínu, Ísrael er að stunda aðskilnaðarstefnu og alvarleg brot á mannúðarlögum eru framkvæmd daglega af Ísrael.

Ísrael er ekki að berjast gegn Hamas. Ísrael er í stríði gegn börnum í Palestínu. Ísrael er markvisst að myrða börn. Um 14 þúsund börn hafa verið myrt á Gaza, þúsundir barna eru týnd undir rústum sundursprengdra húsa og á hverjum klukkutíma eru sex börn myrt á Gaza. Sem þýðir að á meðan að þessi fundur hefur átt sér stað hefur Ísrael myrt 9 börn. Tala myrtra Palestínumanna nálgast hátt í 40 þúsund.

Það er staðreynd að heilbrigðiskerfið á Gaza er hrunið. Sjúkrahús geta ekki sinnt sínu starfi, sjúkrahúsin geta ekki hjálpað fólki og hjúkrað sjúkum. Sjúkrahúsin á Gaza skortir nauðsynleg heilbrigðisgögn, skortir eldsneyti fyrir rafmagni og ítrekað hefur verið ráðist á heilbrigðisstarfsfólk og það myrt. Nýjasta útspil Ísraels er að sprengja sólarrafhlöður sjúkrahúsa til að gulltryggja endanlega að Palestínumenn munu deyja. Ísrael ætlar ekki að hlífa neinum í árásum sínum. Markmiðið er eitt, Palestína á að hverfa.

Palestínumenn hafa reynt ýmsar aðferðir við að berjast gegn hernámi, arðráni og aðskilnaðarstefnu Ísraels. Fyrsta Intifada uppreisnin var of ofbeldisfull fyrir ráðamenn vestrænna ríkja og var niðurstaðan undirritun Oslóarsamkomulagsins. Sem leiddi til viðurkenningar Palestínu á Ísrael en á sama tíma þurfti Ísrael ekki að viðurkenna Palestínu. Ísrael hefur markviss brotið Oslóarsamkomulagið, og eyðilagt það. Aukið hernám, arðrán og aðskilnaðarstefna er það sem Ísrael stundar.

Við tók bið, bið eftir engu og svo skall á seinni Intifadan. Enn og aftur of ofbeldisfullt að mati vestrænna ríkja. Í kjölfar seinni Intifada reyndu Palestínumenn friðsamari aðferð til að berjast fyrir réttindum sínum, sniðgönguhreyfingu í anda sniðgöngu gegn apartheid Suður-Afríku. Friðsöm stefna sem hvetur einstaklinga og ríki til að sniðganga Ísrael þar til ríkið fer að alþjóðalögum. Þessi friðsama aðferð hentar ekki vestrænum ríkjum frekar en aðrar baráttuaðferðir Palestínumanna og hafa verið sett lög víðsvegar í Evrópu og Bandaríkjunum sem einfaldlega banna sniðgöngu gegn Ísrael, friðsöm sniðganga er sögð vera gyðingahatur. Kosningar í Palestínu 2006, sem eftirlitsmenn fundu ekkert athugavert við, leiddu til sigurs Hamas – Niðurstöður sem ekki heldur hentuðu vestrænum ríkjum og viðskiptabann var sett á stjórnvöld Palestínu. Og svo árið 2014 þegar palestínska heimastjórnin reyndi að semja um að Ísrael drægi sig alveg út úr Palestínu, samrýmdist það ekki stefnu Ísraels, og hafa Ísraelar ekki rætt við forystumenn Palestínu síðan.

Á meðan öllu þessu hefur gengið hefur Ísrael sett Gaza í herkví, gert fjórar stórárásir á Gaza, drepið yfir 6 þúsund Palestínumenn á tímabilinu 2008 til 2023, aukið landrán á Vesturbakkanum, ofbeldi landræningja hefur aukist um tugi prósenta, fjölgað landræningjabyggðum í Palestínu og reynt að þurrka Palestínu út af kortinu. Ísrael hefur algjörlega skorið í sundur land Palestínu og stjórnar öllu lífi Palestínumann með harðri hendi, stjórnað hver fer hvert og hvenær, hver fær vatn og hvenær, hver fær rafmagn og hvenær og hver verður drepinn og hvenær.

Það má því spyrja sig – hvaða aðferð Palestínumanna til að berjast fyrir frelsi sínu hentar vestrænum ríkjum? Því það virðist vera að ofbeldi sé ekki rétt aðferð, sniðganga ekki heldur, ekki kosningar og ekki friðarsamkomulag. En vestræn ríki hafa ákveðið hvaða aðferð er rétt og hún er sú að palestínska fólkið á leggjast niður og einfaldlega deyi, hverfi og hætti að vera með vesen.

Og svo kom 7. október – ­­Upphafið að öllu. Vestrænir leiðtogar keppast um að koma fordæmingu áleiðis en gleyma því að upphafið var ekki 7. október. Það sannar þá staðreynd að status-quo, hið stöðuga ástand eða friðurinn er hægfara útrýming á Palestínu, stöðuga ástandið eða friðurinn er í raun morð á Palestínumönnum. Stöðuga ástandið eða friðurinn leiðir til þess að Palestína tapi meira af landi sínu og hverfi hægt og rólega.

Ég veit fyrir víst að íslenska þjóðin stendur ekki með þjóðarmorðum. Íslenska þjóðin er á móti þjóð­ernishreinsunum og íslenska þjóðin stendur með Palestínu. Þótt að íslensk stjórnvöld geta ekki staðið í lappirnar og fordæmt þjóðernishreinsanir sem eru í beinni útsendingu þá veit ég að hugur íslensku þjóðarinnar er hjá Palestínu. Það að íslensk stjórnvöld geti ekki krafist vopnahlés á meðan Ísrael myrðir þúsundir Palestínumanna þá veit ég að hugur þjóðarinnar er með Palestínu. Það að íslenskir ráðamenn reyni að friðþægja sína eigin samvisku með því að auka fé til hjálparstofnana í Palestínu mun ekki fá mig til að þegja. Ég mun ekki þegja fyrr en íslensk stjórnvöld fordæma þjóðarmorðið. Ég mun ekki þegja fyrr en íslensk stjórnvöld fordæma þjóðernishreinsanir og ég mun ekki þegja fyrr en íslensk stjórnvöld slíta stjórnmálasambandi við Ísrael, þangað til að ísraelsk stjórnvöld viðurkenna Palestínu, þangað til að ísraelsk stjórnvöld fari að alþjóðalögum og þangað til að ísraelskir ráðamenn verða dregnir fyrir dómstóla vegna glæpa sinna, fyrir þjóðernishreinsanir og þjóðarmorð á íbúum Palestínu.

En margir spyrja sig, hvað get ég gert. Hvernig get ég á Íslandi gert eitthvað fyrir Palestínu.

Það er hægt að gera svo margt!

Fyrir það fyrsta – mæta! Eins og þið öll hafið gert. Mæta á fundi, mæta á mótmæli og fræðast um málstaðinn.

Númer tvö: Deila efni, hvort sem það er á instagram, facebook, snapchat eða á kaffistofunni. Endurvarpa rödd Pal­estínumanna, dreifa upplýsingum áfram og láta raddir Palestínumanna heyrast sem víðast. Vera dugleg að deila efni. Það skilar árangri.

Númer þrjú sniðganga. SNIÐGANGA Ísrael og fylgja fordæmi snið­gönguhreyfingarinnar gegn Suður-Afríku, fylgja BDS hreyfingu Palestínu og neyða Ísrael til að fylgja alþjóðalögum. Það er ekkert gyðingahatur fólgið í því að neita að versla við ríki sem stundar hernám, aðskilnaðarstefnu og landrán. Facebook síða og instagramsíða íslensku sniðgönguhreyfingarinnar er virk og deilir efni sem er gagnlegt að lesa.

Ágæta fólk – Palestína hefur barist fyrir réttindum sínum í meira en 75 ár. Palestína hefur búið við ofbeldi, hernám, landrán og nýlendustefnu Ísraels í 75 ár. Palestínumenn hafa verið fangelsaðir og drepnir í yfir 75 ár, en Palestínumenn eru ekki að gefast upp. Á meðan Palestínumenn gefast ekki upp þá gefumst við ekki upp. Á meðan Palestínumenn halda áfram að berjast þá höldum við áfram að berjast og á meðan Ísrael stundar þjóðernishreinsanir og þjóðarmorð í Palestínu þá munum við halda áfram að berjast fyrir frjálsri Palestínu. Palestína skuldar okkur ekki neitt, en við skuldum Palestínu það að gera allt sem í okkar valdi stendur til að berjast með þeim, hlið við hlið og dreifa boðskapnum um réttlátan frið og frjálsa Palestínu.

Birtist í Frjáls Palestína.