Innrás Rússa í Úkraínu hefur afhjúp að hræsni Vesturlanda gagnvart Palestínu og Ísrael.
Þegar Rússar réðust inn í Úkraínu brugðust vestræn ríki skjótt við, fordæmdu innrásina og skipulögðu umfangsmiklar refsiaðgerðir, bæði efnahagslegar og menningarlegar gegn rússneskum fyrirtækjum og einstaklingum. Jafnframt hófu Bandaríkin, Bretland og fleiri lönd að senda Úkraínumönnum mikið magn hergagna. Viðbrögð ríkjanna eru eðlileg í ljósi þess að Rússland braut gegn fullveldi landsins, frelsi og mannréttindum Úkraínumanna og fjölda alþjóðasáttmála.
Vesturveldin hafa svarað innrás Rússlandshers í Úkraínu með snið göngu, fjárfestingabanni og refsiaðgerðum. Rússneskir ferðamenn fá ekki að ferðast til fjölda landa, Rússum var kastað út úr Eurovision, rússneskt lista og íþróttafólk fær ekki að taka þátt í viðburðum, rússneskir bankar eru sviptir aðgangi að alþjóðakerfi bankastofnana, rússnesk flugfélög fá ekki að fljúga til Vesturlanda, þúsundir fyrirtækja hafa yfirgefið Rússland og hætt fjárfestingum þar og mörg lönd hafa bannað vöruflutninga til og frá Rússlandi.
Viðbrögð vestrænna ríkja við árásum Ísraela á Palestínumenn eru þveröfug við viðbrögðin gegn árás um Rússa. Í stað þess að beita Ísrael refsiaðgerðum þá veita ríkin, sem nú refsa Rússum, Ísrael ómældan stuðning á öllum sviðum. Til Ísraels eru send fullkomnustu vopn sem völ er á. Árásaraðilanum eru send vopn til að berja á nánast vopnlausri þjóð. Það jafngildir því að í stað Úkraínuhers fengi her Pútíns sendingarnar frá Bandaríkjunum til þess að geta drepið enn fleiri Úkraínumenn. Slík er vitleysan.
Ísrael er ekki beitt refsiaðgerðum þrátt fyrir að Palestínumenn hafa í áraraðir beint áskorunum til ríkja heims um að beita sk. BDS baráttu aðferð, þ.e. sniðgöngu, fjárfestingabanni og refsiaðgerðum (Boycott, Disinvestment, Sanctions).
Stuðningur vestrænna ríkja við Ísrael er ætíð „rökstuddur“ með yfirlýsingum um að Ísraelar hafi rétt til að verja sig. Jafnt íslensk yfirvöld sem önnur yfirvöld í Evrópu og Bandaríkjunum nota þessa möntru. En Ísrael er ekki að verja sig, þeir eru árásaraðilinn. Í áratugi hefur Ísraelsríki ráðist gegn grönnum sínum, stolið landi (Vesturbakkinn, Golan hæðir), svipt íbúa lífi og limum og öllum mannréttindum. Ísrael hefur sent mörg hundruð þúsund eigin þegna til búsetu í þeim hluta landsins sem alþjóðasamfélagið hefur samþykkt sem framtíðarríki Palestínu.
„Árásaraðilanum eru send vopn til að berja á nánast vopnlausri þjóð.“
Viðbrögð Palestínumanna er svar við árásum, frumkvæðið er ætíð hjá stjórnvöldum Ísraels. Það eru yfirvöld Ísraels sem ákveða að byggja æ fleiri landtökubyggðir í landi Palestínu, það eru sömu yfirvöld sem svipta hernumið fólk ferðafrelsi og hafa í raun innlimað svæðin í eigið ríki.
Ýmsir sem hafa gagnrýnt framferði NATO-ríkjanna í málefnum Úkraínu segja að útþensla bandalagsins í austur hafi átt þátt í því að Pútín sendi her sinn af stað – og þar með hafi Pútín verið að verja hagsmuni Rússlands. Hér eru þræddar sömu slóðir og notaðar eru til að réttlæta framferði Ísraels. En líkt og Ísrael, þá eru Rússar árásaraðilinn, þeir hafa hertekið landsvæði Úkraínu og hyggjast innlima það í sitt ríki.
Joe Biden, forseti Bandaríkjanna, maður sem berst gegn öflum innan eigin lands sem vilja lýðræði feigt, styður Ísrael. Hann segir Ísraela hafa bjargað mörgum mannslífum með síðustu fyrirvaralausu árásinni á Gaza. Hann er ekki að fást um börnin 66 sem Ísraelsher drap í þeirri árás, hann var að tala um mögulegt mannfall í Ísrael. Biden hefur lýst sig vera síonista og síonistar syrgja ekki börnin í Palestínu sem eru svipt sinni framtíð.
Ísraelsríki heldur milljónum manna í herkví og sviptir þær frelsi og öllum réttindum – meira að segja réttinum til að lifa.
Ísrael er ríki aðskilnaðarstefnu (Apartheid) eins og fram kemur í skýrslum fjölmargra mannréttindasamtaka. Það þrífst ekki raunverulegt lýðræði þar sem helmingur íbúa svæðisins býr við skert mannréttindi og lifir í stöðugri ógn þegar öflugur her ræðst inn á heimili manna og fangelsar börn.
Þessar staðreyndir sýna hversu illa Ísrael passar inn í okkar heim þar sem flestir kjósa frjálslyndi og lýðræði – og dráp barna eða fangelsun ekki daglegt brauð í boði yfir valda.
Vesturveldin gera rétt í því að styðja Úkraínubúa í baráttu þeirra upp á líf og dauða gegn her Pútíns.
Hins vegar er stuðningur sömu aðila við síonistaríkið Ísrael stuðningur við ofbeldi, landrán, manndráp og ólöglega aðskilnaðarstefnu. Þetta heitir á mannamáli hræsni.
Birtist fyrst í Fréttablaðinu.
