Skútan Madleen siglir með hjálpargögn fyrir nauðstadda íbúa Gaza í viðleitni til að rjúfa margra mánaða herkví Ísraels gagnvart sveltandi og sjúkum á Gaza. Hópur mannúðarsinna á vegum Freedom Flotilla Coalition eru um borð í skútunni, þar á meðal Greta Thunberg umhverfis- og mannréttindasinni.
Þetta hugrakka fólk reynir hér í annað sinn að vekja alþjóðasamfélagið til vitundar um manngerða hungursneyð sem Ísrael beitir til að halda áfram þjóðernishreinsun og þjóðarmorði á Palestínsku þjóðinni. Allt er þetta í fullkomnu trássi við alþjóðalög en ráðamenn á Vesturlöndum heykjast á því að grípa til skilvirkra aðgerða gegn Ísrael til að stöðva þessa stríðsglæpi. Ráðamenn lýsa yfir áhyggjum en á sama tíma útvega þeir vopn til Ísraels og eiga í viðskiptum við ríkið eins og enginn sé morgundagurinn.
Aðgerðir eins og viðskiptaþvinganir og sniðganga er það sem virkar, m.v. fyrri reynslu alþjóðasamfélagsins, en þeim er ekki beitt. Skýringar hérlendra ráðamanna um að nauðsynlegt sé að ná samstöðu með öðrum þjóðum til að hrinda slíkum aðgerðum í framkvæmd er einungis aumlegt yfirklór af þeirra hálfu. Það þarf aðeins hugrekki einhvers ríkis til að stíga fram í þeim efnum og þá fylgja önnur ríki á eftir. Ísland sýndi hugrekki með því að vera fyrsta ríkið til að viðurkenna sjálfstæði og fullveldi Eystrasaltslandanna ásamt því að vera fyrsta ríkið á Vesturlöndum til að viðurkenna það sama fyrir Palestínu. Alþjóðadómstóllinn hefur þegar áminnt öll ríki um að koma í veg fyrir þjóðarmorð á Gaza með öllum tiltækum ráðum. Aðgerðarleysi er einnig þátttaka í þjóðernishreinsunum og þjóðarmorði.
Hægt er að skrifa undir áskorun til ráðamanna að tryggja örugga för Madleen til Gaza sem sérfræðingar Sameinuðu þjóðanna hafa þegar lýst fullum stuðningi við.
Hægt er að fylgjast nákvæmlega með siglingu Madleen hjá Freedom Flotilla Coaliton hér.
