Í Eurovision vikunni í ár myrtu ísraelsk stjórnvöld mörg hundruð einstaklinga á Gaza og særðu enn fleiri. Á sama tíma og fulltrúi síonista í keppninni söng, dansaði og skemmti sér og öðrum voru börn, konur og aðrir almennir borgarar í Palestínu sprengdir, skotnir eða sveltir til dauða.
Um er að ræða blóðugustu vikuna í langan tíma á Gaza og það er engin tilviljun. Fyrir ísraelsríki er evrópska söngvakeppnin miklu meira en keppni í söng. Hún er stórfenglegt áróðursverkfæri og keppnin er þeim mjög mikilvæg. Árum saman hefur ísraelsríki notað Eurovision til þess að styrkja jákvæða ímynd sína á alþjóðavettvangi og hvítþvo stríðsglæpi sína, þjóðernishreinsanir og glæpi gegn mannkyni.
Ísraelsríki er nýlenduríki sem hefur það fyrst og fremst að markmiði að stækka landsvæði sitt, breiða út aðskilnaðarstefnu og yfirburðahyggju sína og ná yfirráði yfir öðrum ríkjum, hvort sem það er með valdi, eins og yfir Bandaríkjunum og mörgum vestrænum ríkjum, hernámi eins og í Palestínu, eða hervaldi eins og í Líbanon. Til þess að ná markmiðum sínum ætla ísraelsk stjórnvöld að þurrka út palestínsku þjóðina.
Þótt ótrúlegt megi virðast, er ísraelsríki mjög annt um ímynd sína á alþjóðlegum vettvangi og leggur mikla vinnu og fjármuni í að reyna að sannfæra heiminn um þá fölsku ímynd að ísrael sé eins og „hvert annað vestrænt lýðræðisríki!“
Þátttaka í alþjóðlegum viðburðum gegnir þar lykilhlutverki og þátttaka í viðburðum eins og Eurovision, sem snúast um gleði, glimmer og samstöðu, er algjör fjársjóður, því meirihluti ríkja, samfélaga og einstaklinga eru enn tilbúin til þess að forgangsraða eigin skammtíma hamingju fram yfir velferð þess næsta.
Stjórnvöld í ísrael eyða á ári hverju gríðarlegum fjármunum í ímyndarherferðir í tengslum við Eurovison. Ríkið kaupir sér velvild, árangur og ímynd og Evrópa tekur fagnandi á móti blóðpeningum þeirra og dansar með þeim í skjóli fjöldamorða og blóðsúthellinga á Gaza. Bókstaflega.
Ímyndarherferð ísraelsríkis síðustu ár hefur meðal annars skilað því að Morroccan oil, ísraelskt fyrirtæki, hefur verið stærsti styrktaraðili keppninnar síðan hún var síðast haldin í ísrael, árið 2019. Öll sem að keppninni koma eiga að nota Morrocan oil vörur og keppnisríki fá meira að segja gefins vörur fyrir undankeppnirnar sínar. Allt sem viðkemur keppninni er merkt fyrirtækinu og auglýsingar fyrirtækisins eru alls ráðandi í keppninni og í keppnisríkjum. Þannig tengir fólk jákvæða upplifun og flott vörumerki við þjóð sem drepur börn.
Herferðin hefur líka skilað sér í góðum árangri ríkisins í keppninni árum saman. Það tengist ekki sérstaklega framlagi ísraela í Eurovision heldur miklu frekar kostaðri herferð, í raunheimum sem og á internetinu, og þá sérstaklega á samfélagsmiðlum, í aðdraganda og á meðan á keppninni stendur.
Á internetinu fer fram kerfisbundin herferð þar sem fólk er hvatt til þess að standa með ísraelsku þjóðinni „í raunum hennar“ með því að kjósa landið í Eurovision. Þar skiptir engu máli hvar þú ert staddur í heiminum. Skýrar leiðbeiningar fylgja um hvernig þú getur kosið ítrekað á netinu. Í ár birtust einnig auglýsingar með fulltrúa ísraela í keppninni þar sem hún hvatti fólk til þess að standa með ísrael á hinum ýmsu tungumálum. Þannig hvatti hún Íslendinga til að kjósa ísrael á íslensku, í kostuðum auglýsingum. Slíkt vekur lukku og tengir ísrael við skemmtilega upplifun.
Þessi skipulagða og kostnaðarsama herferð sem ísraelsríki leggur í ár eftir ár snýst ekki um að vinna Eurovision. Hún snýst um að hylma yfir landrán, aðskilnaðarstefnu og þjóðarmorð, kaupa meðvirkni og samúð Evrópubúa og ýta undir afmennskum palestínsku þjóðarinnar. Hún snýst um að sýna ísrael í skemmtilegu og spennandi ljósi á sama tíma og ríkið slátrar fólki í Palestínu. Það er fjallað meira um Eurovision en hörmungarnar á Gaza í evrópskum fjölmiðlum dögum og vikum saman.
Þetta er alls ekki nýtt, þetta hefur staðið yfir árum saman. Þegar ísrael vann keppnina árið 2018 fögnuðu síonistar á sama tíma og þau drápu almenna borgara í Palestínu. Þeim tókst auðveldlega að sannfæra alla Evrópu um að koma til sín árið 2019 þar sem keppnin var haldin í skugga þjóðernishreinsana sem fóru fram nokkrum kílómetrum frá keppni sem snýst um frið og samstöðu. Ekkert ríki neitaði að taka þátt í þeim hvítþvotti. Öll þátttökuríki voru með fullt af fulltrúum á svæðinu.
Það hefur farið fram hávær umræða um þátttöku ísraelsríkis í alþjóðlegum viðburðum eins og Eurovision, lengi, hér á landi og um allan heim. Á Íslandi hefur umræðan um þátttöku ísrael í Eurovision staðið yfir frá 2018, að minnsta kosti, og hún hefur verið fyrirferðamikil síðustu tvö ár.
Árum saman hefur verið bent á mikilvægi þess að einangra ísrael á alþjóðavettvangi og slíta öllu samstarfi og samvinnu við ríkið, til þess að stöðva þjóðarmorðið í Palestínu. Slíkar aðgerðir myndu hafa neikvæð áhrif á ísrael og ímynd þess, jafnt á alþjóðavettvangi, sem og innan þeirra eigin raða. Neikvæð ímynd hefur áhrif á almenning og það myndi vissulega hreyfa við stöðunni ef ísrael yrði svipt þeirra bestu verkfærum til að breiða út falska ímynd sína.
En, árum saman hefur Evrópa gleypt samviskusamlega við áróðri síonista og við færum þeim þessi verkfæri á silfurfati. Á því var ekki einu sinni undantekning í ár.
Á sama tíma og ísraelsk stjórnvöld framkvæma síðasta farsann í yfirstandandi þjóðernishreinsunum á Gaza, fremja ítrekuð fjöldamorð og slátra saklausum borgurum neita aðstandendur evrópsku söngvakeppninnar að taka það til umræðu hvort vísa eigi ísrael úr keppninni.
Það er með öllu óskiljanlegt því það myndi duga sambandinu að vísa í eigin reglur til að reka ísrael úr keppni því ísraelska ríkissjónvarpið er samsekt þjóðarmorði.
Ekkert þátttökuríki lét sér detta það í hug að neita að taka þátt í skemmtun sem snýst um hamingju og samstöðu með ríki sem er að fremja þjóðernishreinsanir.
Svo lengi sem ísrael fær að taka þátt í Eurovision á sama tíma og ríkið er markvisst að þurrka út palestínsku þjóðina, þá er og verður ísraelsríki sigurvegari keppninnar, því þeim tekst ávallt ætlunarverk sitt.
Að hvítþvo sig, ala á meðvirkni og gera Evrópuríkin samsek þjóðarmorði með afstöðu- og aðgerðarleysi sínu, ár eftir ár, sem hefur sjaldan tekist jafn vel og í ár, sem gefur til kynna hversu brengluð sjálfsmynd Evrópu er.
Skömmin er allra þeirra sem halda ávallt áfram taka þátt í þessu ógeði, sama hvað. Þeirra sem taka meðvitaða ákvörðun um að líta undan því sem er að gerast í Palestínu, þeirra sem eru tilbúin til að setja samúð sína á pásu til að vera með í partýinu, allra þeirra sem taka með einhverjum hætti þátt í Eurovision og öllu í kringum það með ríki sem er að fremja þjóðarmorð, alvarlegasta glæp mannkynssögunnar!
Á meðan það verður ekki breyting á því að ísrael fái að taka þátt í og misnota viðburði eins og evrópsku söngvakeppnina til þess að dreifa áróðri og breiða yfir kerfisbundnar pyntingar þeirra á palestínsku þjóðinni mun ísrael áfram vera sigurvegari Eurovision, vera ríkjandi í að stýra almenningsáliti í Evrópu, komast upp með stríðsglæpi og við hin erum og verðum, beint eða óbeint, samsek í glæpum ísraelsríki gegn mannkyni. Á meðan verður Palestína ekki frjáls.
Verði ykkur að góðu.
Birtist fyrst á Facebook.
