Þeir sem þekkja til sögu síonismans eru ekki undrandi á þeirri þróun sem á sér stað í Ísrael. Að nýloknum þingkosningum blasir við að Netanyahu, formaður Likud flokksins sem atkvæði, hyggst mynda ríkisstjórn fékk flest með þátttöku tveggja hreinna fasistaflokka.
Tveir flokkar á ysta hægri væng stjórnmálalitrófsins styðja stjórnarmyndum Netanyahu gegn því að fá mikilvæg ráðherraembætti í sinn hlut.
Mest áberandi er Ben-Gvir formaður Trúarlega Síonistaflokksins sem tvöfaldaði fylgi sitt í nýafstöðnum kosningum. Ben þessi er sannfærður rasisti sem trúir á kynþáttayfirburði gyðinga og rétt þeirra til að undiroka Palestínumenn og gera þá brottræka úr sínum heimahögum með öllu því ofbeldi sem til þarf. Ben-Gvir, sem nú stefnir á ráðherraembætti, hefur verið dæmdur fyrir rasísk ummæli og stuðning við hryðjuverkahóp síoniskra landtökumanna á Vesturbakkanum. Rasísk stefna Ben-Gvir birtist einnig í andúð hans á samkynhneigðum og öðrum minnihlutahópum.
Hinn flokkurinn byggir einnig á trúarlegum síonisma. Foringinn er Bezalel Smotrich og hann hefur lagt fram óskir um að fá embætti fjármálaráðherra í nýrri ríkisstjórn Netanyahu. Smotrich hefur svipuð stefnumál og Ben-Gvir en vill líka veikja stöðu dómstóla landsins svo öfga-hægrið fái meira svigrúm til þess að rífa niður það sem eftir stendur af mannréttindum í landinu.
Ísraelar kjósa nú í fjórða skipti á fimm árum. Þetta óstöðuga ástand stafar ekki af því að síonísku flokkarnir séu ekki sammála um meginatriðið, sem er að kúga Palestínumenn og ræna landi þeirra, það sem þeir deila um innbyrðis eru völd og barátta um spillingu – ekki gegn spillingu – heldur um það hverjir geta matað krókinn. Netanyahu á yfir höfði sér fangavist vegna spillingar, hver einasti forsætisráðherra á síðustu 20 árum hefur sætt slíkri rannsókn. Þeirra á meðal er Ehud Olmert fyrrv. borgarstjóri og forisráðherra sem sat í fangelsi fyrir skattsvik og skjalafals. Aðrir ráðamenn landsins sem hafa verið sakaðir um spillingu eru Ehud Barak fyrrv. forsætisráðherra, Ariel Sharon einnig forsætisráðherra og Ezer Weismann fyrrverandi forseti. En málið snýst ekki bara um þessa menn, fjöldi forsætisráðherra, þingmanna og borgarstjóra hafa einnig verið staðnir að spillingu í ýmsu formi. Það er gamall frasi að Ísrael sé lýðræðisríki, jafnvel eina lýðræðisríkið í Mið-Austurlöndum. Það er þó tötralegt lýðræði þar sem spilltir stjórnmálamenn og kynþáttahatarar berjast um atkvæðin samtímis því að margar milljónir íbúa svæðisins, sem Ísrael ríkir yfir, fá ekki að kjósa til þingsins þar sem örlög þeirra eru ákveðin. Ennfremur eru um sjöhundruð og fimmtíu þúsund gyðingar með ríkisborgararétt í Ísrael sem fá ekki að kjósa þar sem þeir búa í öðrum löndum. Til þess að kjósa verða þeir að ferðast til Ísraels – en stór hluti þessara Ísraela hafa yfirgefið landið vegna andstöðu við vaxandi þjóðernisstefnu og rasisma í landinu.
Birtist fyrst í Frjáls Palestína.
