John Kerry, utanríkisráðherra Bandaríkjanna lætur enn einsog friðarviðræður sem hann kom á laggirnar á milli Ísraels og Palestínu séu raunverulegar og geti hugsanlega leitt til samkomulags um frið. Kerry er nánast einn um þessa skoðun, ef hann trúir því þá sjálfur. Ísraelsmenn mæta enn á fundina, en hæðast opinskátt að utanríkisráðherra USA, kalla hann kjána eða þaðan af verra. Liebermann utanríkisráðherra Ísraels, hreinn rasisti að áliti margra samlanda sinna, hefur ekki látið sitt eftir liggja í skítkastinu.
John Kerry varaforseti Bandaríkjanna valdi bandarískan gyðing sem jafnframt er ísraelskur ríkisborgari og var á sínum tíma sendiherra USA í Ísrael til að stjórna viðræðunum fyrir sína hönd.
Ekki verður annað sagt en að John Kerry hafi lagt sig fram um að þóknast Ísrael. Hann lætur skammirnar og háðsyrðin sem vind um eyru þjóta. Kerry valdi bandarískan gyðing sem jafnframt er ísraelskur ríkisborgari og var á sínum tíma sendiherra USA í Ísrael til að stjórna viðræðunum fyrir sína hönd. Martin Indyk starfaði á sínum tíma fyrir AIPAC, fjársterkasta þrýstihóp Bandaríkjaþings, sem rekur stefnu Ísraelsstjórnar og teygir hana enn frekar til hægri og til meira landráns. Mörg ár eru síðan Indyk var í þessari vinnu, en hann telst klárlega til síonista, enda þótt Netanyahu forsætisráðherra Ísraels og aðrir haukar í ísraelskum stjórnmálum, þyki hann ekki nægilega leiðitamur. Hann var nefnilega sagður hafa hvíslað því að Obama og Kerry, að ef þeir ætluðu að gera eitthvað raunhæft í friðarmálunum, þyrfti að huga að landamærunum frá 1967 sem eru alþjóðlega viðurkennd.
Það er erfitt að finna Palestínumenn sem hafa minnstu trú á þessum svokölluðu friðarviðræðum. Þær stefna alla vega ekki að sjálfstæði og fullveldi Palestínu innan landamæranna frá 1967. Það eru engin merki þess meðal ráðandi afla í Ísrael að þau ætli sér að skila herteknu svæðunum í samræmi við ályktanir Sameinuðu þjóðanna og alþjóðalög. Þvert á móti er tími friðarviðræðna notaður til að auka á landránið, stækka landtökubyggðirnar, fjölga íbúðum fyrir gyðinga á palestínsku landi, eyðileggja heimili Palestínumanna í Austur-Jerúsalem og víðar á Vesturbakkanum, ráðast á íbúa herteknu svæðanna, meiða og drepa. Inn á milli koma svo stórárásir á Gaza þar sem fleiri hundruð manns eru drepin, jafnt barna sem annarra. Og heimurinn horfir upp á þetta aðgerðalaus, að eitt mesta herveldi heimsins níðist þannig á varnarlausum nágrönnum sínum og brýtur alþjóðlög á degi hverjum, einsog þau komi Ísrael ekki við.
Birtist fyrst í Frjáls Palestína.
