Stjórn Félagsins Ísland Palestína (FÍP) sendi meðfylgjandi bréf til Stefáns Eiríkssonar útvarpsstjóra.
Útvarpsstjóri
Stefán Eiríksson
Reykjavík 8. mars 2022
Daginn eftir að rússneskur her réðist inn í Úkraínu 24. febrúar s.l., var tekin ákvörðun í stýrihóp Eurovision um að meina Rússlandi þátttöku í samkomunni sem að þessu sinni verður haldin á Ítalíu. Stjórn Evrópusambands útvarpsstöðva (EBU) samþykkti síðan þessa afstöðu stýrihópsins.
Felix Bergsson, sem situr í stýrihópi Eurovision, tilkynnti í Kastljósi RÚV þ. 25. febrúar að stýrihópurinn hefði tekið einróma ákvörðun um að Rússland fengi ekki verið með í ár.
Felix Bergsson sagði að „auðvitað reynum við alltaf að halda í þetta ópólitíska yfirbragð sem er á Eurovisionkeppninni og við reynum alltaf að leggja áherslu á að þetta sé ópólitískur viðburður. En núna var mönnum hreinlega nóg boðið“. Að sögn Felix Bergssonar komu yfirlýsingar frá sjónvarpsstöðvum, og þar á meðal RÚV um að vísa beri Rússlandi úr Eurovision. „Það er bara að mönnum er greinilega ofboðið. Þetta er allt út af þessum hryllingi sem við erum að upplifa í Úkraínu“ sagði Felix að lokum.
Árið 2019 ákvað stjórn RÚV að senda íslenska þátttakendur í Eurovision samkomuna sem það sinnið var haldin í Ísrael. Sama ár og keppnin skyldi haldin í Ísrael höfðu ísraelskir hermenn drepið 219 vopnlausa mótmælendur á Gazaströndinni og þar af 28 börn.
Vikurnar fyrir þessa ákvörðun RÚV höfðu mörg þúsund manns undirritað áskorun þar sem hvatt var til sniðgöngu gagnvart Eurovision í Ísrael. Eftir umræður meðal stjórnenda RÚV var tekin ákvörðun um þátttöku „sem grundvallast á því að ekki er um pólitískan viðburð að ræða heldur þvert á móti samkomu ólíkra þjóða sem allt frá stofnun hefur haft að megintilgangi og leiðarljósi að breiða út boðskap sameiningar- og friðarkrafts sem felst í dægurtónlist og menningu almennt“ eins og segir í tilkynningu RÚV.
Ísrael hefur verið þátttakandi í Eurovision frá 1973 og hefur ekki dregið af sér við að ræna landi Palestínumanna, svipta þá mannréttindum og drepa þúsundir allt þetta tímabil. Frá síðustu aldamótum hefur Ísraelsher drepið 2,198 palestínsk börn. Við vitum ekki hvað þessi her hefur drepið mörg börn frá 1973 – en sé miðað við meðaltal áranna 2000 – 2021 er heildin um 5,000 börn. Ekkert land hefur fengið jafn margar ávítur hjá SÞ og Ísrael fyrir brot á samþykktum samtakanna og brot á alþjóðasamþykktum.
Þrenn virt mannréttindasamtök (Amnesty International, Human Rights Watch og B’Tselem) hafa öll, eftir ítarlegar rannsóknir, lýst því yfir að í Ísrael ríki apartheid, þ.e. fólki er mismunað eftir uppruna og trú. Apartheid er ólögleg stefna skv. samþykktum SÞ – samtaka sem Ísland hefur verið þátttakandi í síðan 1946.
Stjórn Félagsins Íslands- Palestína álítur að ákvörðunin um brottrekstur Rússlands vekji upp ýmsar spurningar í ljósi fyrri afstöðu stjórnenda RÚV.
Hver er munurinn á „hryllingnum í Úkraínu“ og framferði Ísraelshers í landi Palestínumanna að áliti stjórnenda RÚV?
Getur stjórn RÚV upplýst hvers vegna RÚV styður þátttöku Ísraels í ljósi þess að það ríki hefur í áratugi stundað mannréttindabrot í trássi við samþykktir SÞ og fleiri alþjóðasamtaka, en á síðan frumkvæði, ásamt öðrum útvarpsstöðvum Evrópu, að brottrekstri Rússlands.
Hvers vegna er stjórnendum RÚV „greinilega ofboðið“ núna? Fer afstaða stjórnenda RÚV eftir því hver framkvæmir mannréttindabrot?
Mannréttindi eru réttindi allra – án undantekninga eins og skráð er í alþjóðasamþykktum.
Má vænta þess að stjórn RÚV endurskoði afstöðu sína til veru Ísraels í Eurovision í ljósi þess að RÚV hefur tekið afstöðu gegn mannréttindabrotum Rússlands?
F.h. stjórnar Félagsins Ísland – Palestína
Hjálmtýr Heiðdal formaður FÍP
Svar óskast á netfangið palestina@palestina.is
