Sniðgönguherferð gegn Ísrael!
Í byrjun árs 2005 var efnt til sniðgönguherferðar gegn Ísrael en um 170 félagasamtök (NGO) gáfu út sameiginlega yfirlýsingu um herferð þar sem ríki og einstaklingar út um allan heim voru hvött til að sniðganga Ísrael á menningar, menntunar og viðskiptalegu sviði. Í yfirlýsingunni voru sett fram þrjú megin markmið fyrir þessari herferð en þau eru:
1) Að Ísrael hætti hernámi og landráni á löndum Araba og að Ísrael rífi niður aðskilnaðarmúrinn.
2) Að Ísrael tryggi að Arabar í Ísrael fái full réttindi og að jafnrétti sé tryggt.
3) Ísrael skal tryggja og viðurkenna rétt palestínskra flóttamanna til að snúa til síns heima og fylgi því ályktun SÞ númer 194.
Þetta ákall til friðar kom ári eftir að Alþjóðadómstólinn í Haag úrskurðaði að aðskilnaðarmúrinn sem Ísrael er að byggja á palestínsku landsvæði væri ólöglegur. Markmiðið með þessu er að hvetja aðila hvar sem er í heiminum að taka til friðsamlegra aðgerða gegn hernáminu og með samstilltu átaki er von á því að Ísrael gefi eftir þrýstingi og fari að virða mannréttindi og alþjóðalög.
Aðferðir Ísraelsmanna hafa lengi borið keim af aðferðum sem notaðar voru í aðskilnaðarstefnunni í Suður-Afríku en landnemar Ísraels hafa hertekið bestu ræktunarlöndin, helstu vatnslindir og stórskert ferðafrelsi Palestínumanna með því að leggja vegi, múra og hindranir á víð og dreif um Vesturbakkann. Ísraelsmenn hafa byggt sér vegakerfi á Vesturbakkanum sem Palestínumenn mega alls ekki koma inn á og er aðeins ætlast til þess að Ísrelsmenn noti það. Í dag hefur múrinn t.d. innlimað helstu vatnslind Palestínumanna inn í Ísrael og umlukið margar borgir algjörlega svo það er aðeins ein leið út úr þeim.
Þrátt fyrir að ANC & Mandela notuðu vopnaða baráttu í Suður-Afríku virtist það ekki duga til að brjóta niður hernámið í Namibíu og aðskilnaðarstefnuna sem var við lýði! Það var ekki fyrr en alþjóðlegur þrýstingur varð að veruleika að eitthvað fór að gerast í málefninu en skilaboðin til yfirvalda S-Afríku voru einföld: Ekkert menningarsamstarf, engin viðskipti, engir Ólympíuleikar eða íþróttasamstarf – fyrr en hernámið og aðskilnaðarstefnan heyrðu sögunni til.
Eftir áralanga baráttu í Suður-Afríku féll aðskilnaðarstefnan og jafnrétti var sett á laggirnar og við vonum að með þessari baráttu verður raunin sú sama. Við getum ekki fallist á það að lifa hér á 21. öldinni vitandi það að ríki sem við teljum vera með mestu ríkjum heims sé að stunda grimman aðskilnað, ólöglegt hernám og myrði saklausa borgara á hverjum degi.
Félagið Ísland-Palestína svaraði ákalli þessara hreyfingar og höfum við reynt að kynna fyrir fólki hve mikilvægt það er að sniðganga Ísrael og hvað það getur leitt af sér. Á Íslandi er ágætis fjöldi af ísraelskum vörum og samkvæmt Hagstofu Íslands voru fluttar inn vörur frá Ísrael árið 2009 fyrir 732,5 milljónir króna og þar af vega grunnefni til efnaiðnaðar, grænmeti, ávextir og ýmsar vélar og samgöngutæki þyngst. Þær ísraelsku vörur sem standa almenningi til boða í verslunum eru t.d. avókadó og greipaldin. Mikilvægt er að varast þær vörur sem merktar eru „Palestinian Produce“ eða jafnvel „Product of Palestine“ því þær eru oftast framleiddar af ísraelskum landræningjum á herteknu svæðunum.
Meðal þeirra vara sem finnast í dag eru fersk krydd (tímían, basilikum, kóríander, o.s.frv.) í kælideild Bónus undir vörumerkinu King’s. Í Byko má finna Kapro málbönd og hallamál. Í Krónunni er breytilegt hvaðan ferskir ávextir og grænmeti eru keypt inn en í Krónunni er mjög skýrt merkt með fána og nafni lands hvaðan vörurnar koma. Sem dæmi um ísraelska ávexti má nefna avókadó frá Kedem Hadarim . Í búðum The Pier og Signature of Nature í Smáralindinni er að finna húðkrem og aðrar snyrtivörur frá Yes To, bæði Yes To Carrots og Yes To Cucumbers. Einnig eru vörur frá Sea of Spa og Sea of Life.
Á heimasíðu Félags Íslands-Palestína (palestina.is) má sjá lista og myndir yfir helstu ísraelskar vörur á Íslandi. Við hvetjum fólk til að kynna sér listann en listinn er þó alls ekki tæmandi og ef fólk finnur ísraelskar vörur í verslunum á Íslandi sem ekki eru á listanum þá viljum við endilega að þið sendið okkur email (palestina@palestina.is) og greinið okkur frá því svo að við getum bætt þeim við í safnið.
Lifi frjáls Palestína!
Birtist fyrst á Frjáls Palestína.
