Blaðamannafélag Íslands sendi í dag bréf til Kristrúnar Frostadóttur forsætisráðherra og Þorgerðar Katrínar Gunnarsdóttur utanríkisráðherra þar sem kallað var eftir því að íslensk stjórnvöld stígi harðar fram gegn aðgerðum Ísraels gegn almenningi og blaðamönnum á Gaza og sýni frumkvæði og dug í baráttunni fyrir mannréttindum, alþjóðalögum og sannleikanum. Bréfið er svohljóðandi:
Efni: Ákall frá BÍ til íslenskra stjórnvalda um aðgerðir vegna hörmunganna á Gaza
Ágætu ráðherrar,
Blaðamannafélag Íslands (BÍ) fordæmir harðlega morð Ísraelshers á blaðamönnum á Gaza, en stjórnvöld í Ísrael hafa opinberlega viðurkennt að hafa með skipulögðum hætti beint árásum sínum að blaðamönnum. Í gær myrti Ísraelsher fimm blaðamenn sem voru við störf hjá fréttamiðlinum Al-Jazeera fyrir utan al-Shifa sjúkrahúsið í Gaza-borg. Meðal þeirra var Anas al-Sharif, sem var einn af fáum blaðamönnum sem miðluðu fréttum beint af vettvangi stríðsins því stjórnvöld í Ísrael hafa kerfisbundið neitað alþjóðlegum fjölmiðlum um óháðan aðgang að Gaza. Með því hafa þau reynt að koma í veg fyrir að almenningur, og þar með alþjóðasamfélagið, fái réttar og sannar upplýsingar um það sem þar er í gangi og geti brugðist við stríðsglæpum og mannréttindabrotum. Morðin í gær eru nýjasta dæmið um skipulagðar og viðvarandi árásir Ísraelshers á þá blaðamenn sem neyðast til að hætta lífi sínu til þess að upplýsa umheiminn um framferði Ísraelshers gegn almenningi á Gaza en minnst 186 blaðamenn hafa verið drepnir á Gaza frá 7. október 2023, samkvæmt upplýsingum frá samtökunum Committee to Protect Journalists (CPJ).
Á sama tíma og Ísraelsher myrðir palestínska blaðamenn sem flytja fréttir frá Gaza og ísraelsk stjórnvöld koma í veg fyrir að erlendir blaðamenn og fréttamiðlar fái aðgang að vettvangi, fremja Ísraelsmenn þjóðarmorð á Palestínumönnum. Það gera stjórnvöld meðal annars með því að beita hungri sem vopni í stríði sem hefur valdið því að tugþúsundir barna og fullorðinna þjást af vannæringu og mörg hafa jafnvel látið lífið. Þrátt fyrir fjölmiðlabann Ísraelsmanna hafa ljósmyndir af vannærðum börnum og hungruðu fólki í biðröðum eftir matvælum frá hjálparstofnunum birst í erlendum og alþjóðlegum fréttamiðlum og vakið athygli heimsbyggðarinnar á þeim hryllingi sem íbúar á Gaza búa við. Sýnir það mikilvægi þess að blaðaljósmyndarar og aðrir fréttamenn fái aðgang að svæðinu til þess að geta milliliðalaust miðlað upplýsingum til almennings. Meðal þeirra sem svelta á Gaza eru palestínskir blaðamenn sem eru einu blaðamennirnir sem hafa tækifæri til að miðla áfram staðreyndum og sönnunum á stríðsglæpum og mannréttindabrotum Ísraels.
BÍ fagnar því að íslensk stjórnvöld hafi ásamt sjö öðrum ríkjum fordæmt þá ákvörðun ísraelskra stjórnvalda að útvíkka hernaðaraðgerðir sínar sem muni leiða til þess að mannúðarkrísan, sem er ein sú alvarlegasta á síðari tímum, muni versna enn frekar. BÍ hvetur íslensk stjórnvöld til þess að stíga nú enn harðar fram gegn aðgerðum Ísraels gegn almenningi og blaðamönnum. Íslensk stjórnvöld verða að beita sér af alefli á alþjóðavettvangi, innan Sameinuðu þjóðanna, Evrópuráðsins og víðar, með það að markmiði að alþjóðasamfélagið grípi til tafarlausra aðgerða til að stöðva þjóðarmorð á Gaza, skipulögð morð á blaðamönnum og tryggja vernd óbreyttra borgara. BÍ hvetur stjórnvöld jafnframt til að fordæma opinberlega skipulögð morð á blaðamönnum og krefjast óháðrar, alþjóðlegrar rannsóknar á öllum drápum Ísraelshers á blaðamönnum. Ennfremur þarf að knýja á um tafarlausa afléttingu á aðgangsbanni erlendra blaðamanna að svæðinu og tryggja öryggi þeirra og óhindraðan aðgang fréttamiðla að vettvangi. Þá er nauðsynlegt að tryggja öryggi palestínskra blaðamanna á vettvangi og veita þeim stuðning og skjól.
BÍ kallar eftir því að íslensk stjórnvöld sýni frumkvæði og dug í baráttunni fyrir mannréttindum, alþjóðalögum og sannleikanum.
Fyrir hönd Blaðamannafélags Íslands,
Sigríður Dögg Auðunsdóttir formaður.
Birtist fyrst á vefsíðu Blaðamannafélags íslands.
